తెలుగు రాష్ట్రాల్లో ములుగు ఎమ్మెల్యే సీతక్క అంటే తెలియనివారు ఎవరూ ఉండరని చెప్పడంలో అతిశయోక్తి లేదు. పాలిటిక్స్‌లో ప్రజలకు నిస్వార్థంగా సేవ చేయాలనుకునే రాజకీయ నేతలు కొంతమందే ఉంటారు. అలాంటి వారిలో సీతక్క ముందు వరుసలో ఉంటారు. ఎప్పుడూ ప్రజల్లోనే ఉంటూ, ప్రజల సమస్యలను తెలుసుకుని పరిష్కరిస్తూ మంచి నాయకురాలిగా పేరు తెచ్చుకున్నారు. కరోనా మహమ్మారి విజృంభించిన సమయంలో ప్రజలకు కావాల్సిన నిత్యావసర సరుకులు అందించారు. దీంతో పార్టీలకతీతంగా అన్ని పార్టీల నేతలు సీతక్కను అభిమానిస్తారు.వచ్చే ఎన్నికల్లో మరోసారి ములుగు నుంచి కాంగ్రెస్‌ తరపున సీతక్క పోటీ చేసే అవకాశాలున్నాయి. అయితే తన కుమారుడు సూర్యను కూడా వచ్చే ఎన్నికల్లో పోటీలోకి దింపాలని సీతక్క గత కొంతకాలంగా భావిస్తున్నారు. ఖమ్మం జిల్లాలోని పినపాక నియోజకవర్గం నుంచి కుమారుడిని బరిలోకి దింపాలని సీతక్క ప్రయత్నిస్తున్నారు. దీని కోసం ఇప్పటినుంచే కొడుకు సీటు కోసం అధిష్టానం దగ్గర చర్చలు జరుపుతున్నారు. టీపీసీసీ చీఫ్‌ రేవంత్‌ రెడ్డితో సీతక్కకు మంచి సాన్నిహిత్యం ఉంది. అలాగే ఏఐసీసీ స్థాయిలో కూడా సీతక్కకు పరిచయాలు బాగానే ఉన్నాయి.తనకు ఉన్న పరిచయాలతో కుమారుడికి పినపాక సీటు ఇవ్వాలని ఇప్పటినుంచే సీతక్క కోరుతున్నారట. అందులో భాగంగా గత కొంతకాలంగా సూర్య పినపాక నియోజకవర్గంలో ఎక్కువగా పర్యటిస్తున్నారు. నియోజకవర్గంలోని కాంగ్రెస్‌ క్యాడర్‌తో సత్సంబంధాలు కొనసాగిస్తున్నారు. కాంగ్రెస్‌ క్యాడర్‌ దూరం కాకుండా పార్టీని పటిష్టం చేస్తున్నారు. దీంతో పినపాక కాంగ్రెస్‌ సీటు సూర్యకే వస్తుందనే ప్రచారం బలంగా జరుగుతోంది. అలాగే కుమారుడి కోసం సీతక్క కూడా తరచూ పినపాక నియోజకవర్గంలో పర్యటిస్తున్నారు.సీతక్కనే పినపాక నియోజకవర్గం నుంచి వచ్చే ఎన్నికల్లో పోటీ చేస్తారనే ప్రచారం గతంలో జరిగింది. కానీ తన కుమారుడి కోసం సీతక్క ఆ నియోజకవర్గంలో ఎక్కువగా పర్యటిస్తున్నట్లు హస్తం పార్టీ శ్రేణుల్లో ప్రచారం సాగుతోంది. గత ఎన్నికల్లో పినపాక నియోజకవర్గం నుంచి కాంగ్రెస్‌ తరపున రేగా కాంతారావు విజయం సాధించారు. ఆ తర్వాత ఆయన గులాబీ పార్టీ కండువా కప్పుకున్నారు. పార్టీ మారిన రేగా కాంతారావుకు చెక్‌ పెట్టేందుకు బలమైన అభ్యర్థిని రంగంలోకి దింపాలని రేవంత్‌ రెడ్డి భావిస్తున్నారు. అందులో భాగంగా సీతక్క కుమారుడిని పోటీలోకి దింపేందుకు రేవంత్‌ కూడా సుముఖంగా ఉన్నట్లు తెలుస్తోంది. దీంతో కాంగ్రెస్‌ అధిష్టానాన్ని ఒప్పించి పినపాక సీటు సూర్యకే వచ్చేలా చేస్తానని రేవంత్‌ హావిూ కూడా ఇచ్చినట్లు వార్తలు జోరుగా వినిపిస్తున్నాయి.